डोंबिवली – मुंबई, डोंबिवली परिसरातील जैन मंदिरांच्या मध्ये सोवळ्यात दर्शनाच्या निमित्ताने जाऊन देव्हाऱ्यातील धार्मिक विधीसाठी लागणारा चांदीचा ऐवज चोरणाऱ्या सराईत चोरट्याला रामनगर पोलिसांनी गिरगाव मधील खेतवाडी भागातून मंगळवारी अटक केली. मुंबईत नऊ पोलीस ठाण्यांमध्ये त्याच्यावर जैन मंदिरात चोरी केल्याचे गुन्हे दाखल आहेत. नरेश अगरचंद जैन (४७) असे आरोपीचे नाव आहे. तो मुंबईतील गिरगाव मधील खेतवाडी गल्ली चार मधील राधाकृष्ण इमारतीत राहतो.
मागील आठवड्यात डोंबिवलीतील आदिनाथ गृह जिनालय (टाटा पॉवर लाईन), श्री पार्श्वगज जैन संघ मंदिर (रामनगर), शांतिलाल जैन मंदिरातून (मानपाडा) सकाळी १० ते पाच वेळेत देव्हाऱ्यातील चांदीची फुले, चांदीची लगड, चांदीचे ताट, आरती ताट, निरंजन, पंचपाळ, चांदीचा कलश, चांदीचा नारळ असा एकूण सोळाशे ग्रॅम वजनाचा ९५ हजार रूपये किमतीचा चांदीचा ऐवज चोरीला गेला होता. भाविकाच्या वेशात मंदिरात येऊन एका भामट्याने हे चोरीचे कृत्य केल्याचे मंदिरांमधील सीसीटीव्ही चित्रणातून दिसून आले होते. एकच भाविक या तिन्ही चोऱ्यात करत असल्याचे दिसून आले होते.
